Жалғызбасты әкенің тұрмыс тауқыметін шешуге министрдің өзі араласты

Астанада шиеттей бала-шағасымен жалғыз қалып, тұрмыс тауқыетін тартқан Қалмұрат Сейдақпаровтың мәселесін шешуге министрдің өзі араласты. Еңбек және халықты әлеуметтік қорғау министрі Гүлшара Әбдіхалықова жалғызбасты әке туралы бейнематериалды кешегі жаңалықтарымыздан көргенін және тиісті орындарға нақты тапсырма бергенін мәлімдеді. Ал  ойдажоқта жұбайы тастап кетіп, бес баласын 35 мың теңге жалақысына  жалғыз асырап отырған батыр әкеге көмектесемін деп еліміздің барлық аймағынан, тіпті, шетелдегі қандастарымызға дейін  хабарласып жатыр.

Мұндай тартуды күтпеген балғындардың  жүзіне күлкі үйірілген. Бала көңіл ғой,  жомарт жандар әкеп берген сыйлықтар мен тәттілерді өзара үлестіріп алып жатыр. Ал әкелерінің  ұялы телефонына дамыл жоқ.  «Қолұшын берейік»  деп қоңырау шалғандарға жауап беріп үлгермей жатыр.

Дастарқан да бұл жолы жұтаң емес, жайнап тұр. Отбасының тартқан тауқыметіне бейжай қарай алмаған қайырымды жандар азық-түлік, киім-кешекпен қатар ақшалай да көмек беруде. Тіпті   ғаламтор  арқылы біздің арнадағы сюжетті көрген  шетелдегі қандастарымыз да хабарласып, қаржылай қолдау көрсетуге әзір екендіктерін айтқан.

Қалмұрат Сейдақпаров, көпбалалы,  жалғызбасты әке:

- Рахмет, сондай жігіттерге! Америкадан хабарласып жатыр,  өздері бөтен мемлекетте жүріп. Азаматтарға рахмет!

 Әйелі Өзбекстандағы бұрынғы куйеуіне  кетіп қалып, бес баласымен жалғыз қалған 33 жастағы апталдай азаматтың тағдыры шенеуіктерді де селт еткізгендей. Шаңыраққа арнайы бас сұғып, балаларды бақшаға, оларға  жәрдемақы алуға қажетті құжаттарын, сондай ақ баспана мәселесін  қолдан келгенше шешіп  беруге уәде етті.

- Осы құжатты әкелесіз. Куәлікті әкеліңіз. Ертең келесіз,  сосын көмек көрсетеміз.

Қалмұраттың тартқан тауқыметін біздің жаңалықтардан  көрген  министр Гүлшара Әбдіхалықова да  бейжай қалмаған.

Осылайша   көңілі жомарт,  пейілі кең азаматтар жалғызбасты әкені жалғыз қалдырып жатқан жоқ.