Галина Сотникова «Тау Самалы» шағынауданында 20 жылдан бері тұрады. Осы уақытқа дейін бірде-бір туысы мен немересін үйіне шақырмапты. «Себебі тұратын жерім қауіпті» дейді келіншек.

Галина Сотникова:

— Мен үнемі үрей үстінде жүремін. Төбемізді мына үйлер басып қала ма деп қорқамын. Барлығында бассейн бар. Жазғы уақытта суды ағызып қояды. Сел болмаса екен, топан су баспаса екен деп отырамыз. Немерелерімді мұнда жолатпаймын. Баспанамды сатпақшы да болдым, ешкім алмады.

Төтенше жағдайдан кейін бұл ауданның тұрғындарынан маза қашқан. Үйі таудың етегінде орналасқан олар тағы көшкін болатын болса, үйінді астында қаламыз ба деп қорқады. Бірақ тұрғындар қауіпсіздік мәселесін мынадай жар үстіне үй тұрғызғанда ойламаған сыңайлы.

Тұрғындардың айтуынша, ауданда 100-ден аса үй бар. Тау жотасында орналасқандықтан көбісінің қабырғасы үгітіліп, тастары төменге сырғып түсіп жатыр екен.

Роза Оразымбетова:

— Әрине, мына жер тау, қауіпті, өте қауіпті. Өйткені саяжайлар бар ғой, суды ашып қояды. Сол су ана жерге жиналады. Қорқынышты. Кеше қорықтық қой, қатты қорықтық. Мына жерде бір қыз үйін сатып кетті. Басқасын білмеймін. Керісінше қаладан келді десе, енді осы жақтан қашатын болды.

Ал аудан әкімі бұл аймаққа жаңа құрылыс жобасы бойынша үй салуға болмайтыны айтты. Әрі коммуналдық жүйелер стандартқа сай емес деді.

Еркебұлан Оразалин, Медеу ауданының әкімі:

— Жақында қалада егжей-тегжей жоспар қабылданып, оған болашақта құрылыс салуға болмайтын жасыл аймақтар да енгізілген. Көшкін болған аумақ осындай аймақта орналасқан.

Мұндағы секторлардың көбі стандартқа сәйкес емес. Оның ішінде су құбырымен қатар кәріз желілері бар. Көбі таулы жерде тұратындарына қарамастан, жекеменшік септик пайдаланады.

Жалпы Алматының кей жерінде бейберекет жүріп жатқан құрылыс жайы Сенат депутаттарын да толғандырып отыр. Закиржан Кузиев құрылыс кодексін қайта қарауды ұсынады. Қауіпті саналатын аймақтарда сақтық шараларын сақтаған жөн дейді.

Закиржан Кузиев ҚР Парламенті Сенатының депутаты

— Қауіп әлі де бар. Президент кеше ғана осы туралы айтты. Мегаполистің қауіпсіздігі қыл үстінде тұрғанына көзіміз жеткендей. Құрылысы жүріп жатқан нысандарда да, құрылысы басталмаған нысандарда да нормалар сақталмауы мүмкін. Біз бұған дейін бірнеше рет депутаттық сауалдар жолдадық. Қала құрылысы туралы жаңа заң жобасы әзірленіп жатыр, жұмыстар жасалынуда деген жауапты естумен болдық. Енді жаңа Үкімет осыны қолға алады деп ойлаймыз.

Арнайы комиссия "қауіп жоқ" десе де, тау бөктерінде тұратын тұрғындардың қорқынышыг сейілте қоймады. Жұрт ең болмағанда құтқарушылар бүгінгідей лай көшкіні туралы алдын-ала ескертсе, дейді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!