Жарыс Қарағандыда 14-15 ақпанда өткен. Арслан бірінші күні екі қарсыласын ұтыпты. Келесі күні финалда сынға шығады. Қатты соққыны сол кезде алған. Баланың есеңгірегені видеода анық көрініп тұр. Екінші раундқа делсал күйде шыққан ол, тағы бірнеше соққы алып, қарсыласа алмай отырды да қалды.

Бақытжан Қалиева, А.Атымтаевтың апасы:

— Бірінші раундта соққыға жығылды, тыйым салынған соққыдан. Сол жерде тұрған рефери судьялар, жеке жаттықтырушысы баланың жағдайына қарамай, екінші рауындқа шығарып жібереді. Бірақ ол жаңағы соққыдан кейін, бала басқа құлағаннан кейін, тоқтатып, баланы қарап, тексеріп, екінші шабуылға дәрігердің рұқсатымен ғана шығару керек еді.

Арслан октогоннан шығысымен комаға кеткен. Ұйымдастырушылар жедел жәрдем шақыртудың орнына, есінен танған баланы жеке көлікпен ауруханаға апарыпты. Туыстарын ашындырып отырғаны да осы. Балаға медициналық көмек дер кезінде көрсетілмеген. Бұлар жеткізген ауруханада нейрохирург болмаған. Ол басқа ауруханадан келіп ота жасағанша, үш сағат жоғалтыпты. Дегенмен жарысты ұйымдастырушылар бәрін регламент бойынша жасадық, бізден кінә жоқ деп отыр.

Әділет Нұрмадиев, жарыстың бас төрешісі:

— Иә, ол соққы алды, бірақ бұл рұқсат етілмеген тәсіл емес. Соққыдан кейін есінен танып қалған жоқ. Сондықтан белдесу жалғаса берді. Іс-қимылынан қауіпті байқамадық. Мен Арслан тарапынан қарсыласу белгілері жоғалған соң, белдесуді тоқтаттым. Мүмкін бала өзін жайсыз сезініп ауырып тұрды ма, оны енді оның жеке бапкерінен сұрау керек.

Туыстарының арызы бойынша қылмыстық іс қозғалған. Бірақ байқамай, басқаның денсаулығына зиян тигізу бабы бойынша оның сол кездегі қарсыласы жауапқа алынбақ. Бірақ Арсланның жақындары баланың жағдайын бағамдай алмаған бапкері, рефери мен төрешілер жазалануы тиіс деп отыр. Арслан әлі ауыр күйде жатыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!