Қазақстандық парадзюдошы Ерғали Шәмей алтынға таласады
Қазақстандық парадзюдошы Ерғали Шәмей Парижде өтіп жатқан Паралимпиада ойындарының финалына шықты.
Фото: Туризм және спорт министрлігі
17:42 06.09.2024
Парадзюдодан әлем және Азия ойындарының чемпионы Ерғали Шәмей J1 санаты бойынша 73 келіге дейінгі салмақта жартылай финалдық кездесуде Германия спортшысы Ленарт Сассты 10:1 есебімен жеңді.
Қазақстандық балуан бастапқы белдесуінде Еуропа чемпионатының күміс жүлдегері, франциялық Арминдо Родригесті таза ұтты — 10:0.
Тағы бір қазақстандық Даяна Федосова J2 санатында 57 келіге дейінгі салмақта сенсация жасап, Паралимпиаданың екі дүркін күміс жүлдегері, әлем чемпионатында күміс алған бразилиялық Люсия Тейшейра Араужо да Сильваны қапы қалдырды — 10:0.
Дегенмен ол жартылай финалда Рио Паралимпиадасының қола жүлдегері, жапониялық Дзюнко Хиросэге есе жіберді. Сөйтіп Даяна қола жүлде үшін түркиялық Донду Есильюртпен күреседі.
Финалдық белдесулер Астана уақытымен сағат 19.00-ге жоспарланған.
Дереккөз: Kazinform
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
