Коронавирус инфекциясынан тағы 25 адам көз жұмды. Осылайша қауіпті кесел құрбандарының саны 610 болды. Жұқпалы дертті соңғы тәулікте 1630 адам жұқтырған.  Ал Денсаулық сақтау министрінің пікірінше, елдегі эпидемиологиялық ахуал тұрақталып келе жатыр. «Карантин енгізілгелі коронавирус жұқтыру өсімі 4 пайыздан 2,1 пайызға азайды», - дейді Алексей Цой.

Елімізде 1-тамыздан бастан пневмония мен коронавирус жұқтырғандарға қатысты статистика біріктірілетіні белгілі. Ал әзірге ковид-19-ға қатысты мәлімет күнде жаңартылып отыр. Қауіпті вирус бір тәуліктің өзінде 1630 адамнан анықталды. Оның 745-інде дерттің белгілері жоқ. Кесел құрбандарына қатысты статистика да өсіп барады. Індеттен көз жұмғандардың жалпы саны 610-ға жеткен. Осыған дейін ковид-19  40 жүкті әйелдің өліміне себеп болыпты. Бірақ бұл сүреңсіз статистикаға қарамастан, елдегі эпидахуал тұрақталып келе жатыр дейді Денсаулық сақтау министрі.

Алексей Цой, ҚР Денсаулық сақтау министрі:

-Жүргізілген жедел шаралардың арқасында екі аптада біршама оң нәтижеге қол жеткіздік. Тәулігіне коронавирус жұқтыру өсімі 4 пайыздан 2,1 пайызға азайып, COVID-19 ауруынан жазылғандардың үлесі жалпы ауырғандардың 60 пайызына жетті. Жедел жәрдем шақыру 23 пайызға төмендеп, провизорлық төсек-орындардың жүктемесі 20 пайызға, жансақтау бөлімінің жүктемесі 6 пайызға азайған.

Дегенмен кей өңірлерде жағдай жақсармай тұр. Мәселен, Шығыс Қазақстан облысында соңғы тәуліктің өзінде 163 науқас індеттің ілмегіне ілініпті. Әсірсе Өскемен, Аягөз қаласы мен Жарма ауданы COVID-19-дың ошағына айналған. Сондықтан бұл өңірлерде карантиндік шектеу шаралары күшейтілген. Қоғамдық көліктердің жұмыс кестесі қысқартылып, тұрғындардың себепсіз жүріп-тұруына тыйым салынды. Дәрігерлер дәл осындай шектеулердің арқасында Семейдегі науқас саны азайды дейді.

Бағлан Тауанова, ШҚО тауарлар мен көрсетілетін қызмет сапасы мен қауіпсіздігін бақылау департаментінің баспасөз хатшысы:

-Осыған дейін Семей қаласында қолданылған қатаң шектеу шарасы өз нәтижесін берген болатын. Егер маусым айында бір күнде 40-50 адамнан тіркелген болса, қазір дерт жұқтырғандар азайды. Бүгінде Семейде бір күнде 10-20 науқастан ғана тіркелуде. Қазір осы әдіс ауру өршіп тұрған өзге аудандарға қолданылуда.

Атырау облысындағы ауру жұқтырғандардың жалпы саны 9 мыңнан асты. Президент сынынан кейін бұл өңірге үкімет мүшелерінен құралған арнайы жұмыс тобы келіп, жаңа қаулылар қабылданған. Тіпті көрші облыстар мен Ресейден дәрігерлер шақыртылып, дәрі-дәрмек қоры толықтырылды. Дәрігерлер соның арқасында коронавирус жұқтыратындар едәуір азайды дейді. Мәселен, осыған дейін бір тәулікте 450-500 адамның сынамасынан індет анықталса, қазір 190-200 адамға дейін түсіпті.

Сәдуақас Байқабылов, Атырау облысының бас дәрігері:

-Мемлекет басшысының Атырау облысындағы жағдайға қатысты айтқан сынынан кейін көп нәрсе өзгерді. Осыған дейін ақпараттық, түсіндіру жұмыстарының әлсіздігі, мамандар тапшылығы мен медициналық препараттардың жетіспеушілігі өңірдегі эпидемиологиялық ахуалды ушықтырып жіберді. Жаңа қаулылар қабылданғаннан кейінгі  кешенді шаралардың арқасында қазір жағдай біршама тұрақталып келеді.

Соңғы мәлімет бойынша, елімізде қауіпті індетті жұқтырғандардың жалпы саны 73 мыңнан асты. Оның 9 жарым мыңға жуығы алматылық. Осылайша дертке қатысты антирейтингте Алматы көш басына шығып отыр. Одан кейінгі орында Атырау облысы мен Нұр-Сұлтан қаласы тұр. Қауіпті дертті  бүгінге дейін 45 мыңнан астам отандасымыз жеңіп шыққан.