Шыр етіп дүниеге келгеннен әр күнің, әр қадамың мереке. Өйткені, қазақ – тойшыл халық. Шілдехана, бесік тойдан бастап, әр қызығың «ақ түйенің қарыны жарылған» қуанышты күн есептеліп, қазан көтеріледі.  Ия, қазақта той көп, бірақ ұлығы қайсы?

Күміс той. Ширек ғасыр. Айтқанға оңай, әрине. Алайда, 25 жылдың қоржынында талай қиындықтар мен қызықтардың болғаны анық.

Жалпы әр адамның өмір сүру қағидасы әр алуан. Мәселен, біреулер табиғатынан жалқаулықтың торынан шыға алмай, кез-келген нәрсеге еш қиындықсыз қол жеткізудің жолын іздесе, енді біреулер мақсатқа жету жолында бар күш жігерін аямай еңбек етеді. Ал, бүгін «Кеттік тойға» бағдарламасы маңдай тер, табан етімен адал еңбек етудің не екенің жақсы түсінетін жанға тосын сый жасамақ.

Болат есімді бұл азамат «өмірде өзгеге емес, өзіңе ғана сен» деген қағидамен өмір сүретін жан. Ол ес білгелі бері әке-шешенің айтқан ақылын жадына сақтап, әр нәрсеге өз еңбегімен қол жеткізуді мақсат етті, оған қоса еңбекқор болғанда ғана көштен қалмайтынын ұқты. Бүгінде бойындағы сол қасиетіне туыстары сүйсіне қарайды.