Тікелей эфир: Дельта Банк жабылды
Елімізде тағы бір қаржы ұйымы жабылып тынбақ! Ұлттық банк бұған дейін қайта-қайта «қара тізімге» ілінген Дельта Банктің ақыры қызметін тоқтатты. Өйткені, мекемедегі ақша аударымдарына қатысты заң бұзушылықтар сол күйі ретке келмеген. Осы былықтар үшін де Дельта Банк бірнеше рет депозитке ақша қабылдау мен шот ашу лицензиясынан айырылған болатын. Дельта банктің тізгіні қазір Ұлттық банктің қолында. Енді Бас банк оны тарату туралы сотқа шағымданбақ.
Автор: Нұргүл Нұрланқызы
03.11.2017
Қазір бізбен тікелей байланысқа тілшіміз Нұргүл Нұрланқызы шығып тұр. Нұргүл, қайырлы күн! Дельта Банк туралы соңғы ақпараттармен бөліссеңіз.
-Сәлеметсіз бе, Ерланби! Дельта Банктің салымшылары сары уайымға салынатын кез басталды. Өйткені, Ұлттық банк оның қызметін тоқтатты.
Яғни, қаржы ұйымын банктік операциялар мен бағалы қағаздар нарығында қызмет жүргізуге берілген лицензиясынан айырды.
Әзірге Дельта банктің өкілеттілігі Данияр Ақышевтың бұйрығымен тағайындалған әкімшілікке өткен.
Ол уақытша ғана жұмыс істейді. Яғни, банкті тарату туралы сот арнайы комиссия құрғаннан кейін қызметін тоқтатпақ. Айта кетсек, Ұлттық банк Дельта Банкті мәжбүрлі түрде тарату туралы құзырлы орындарға шағымдануға ниетті.
Мұның бәріне қаржы ұйымының қайта-қайта «қара тізімге» ілінсе де, заңды өрескел бұзуын тоқтатпауы себеп.
- «Delta Bank» төлем, аударым операциялары бойынша шарттық міндеттемелерді тиісінше орындамағаны үшін, үнемі пруденциялық нормативтерді, басқа да сақталуы тиіс нормалар мен лимиттерді бұзғаны үшін 2008 жылдың 24-інші қазанында берілген банктік және өзге де операциялар мен бағалы қағаздар нарығында қызмет жүргізуге берілген лицензиядан 2017 жылдың үшінші қарашасынан бастап айырылады.
ҚР Ұлттық банкі
-Ал, банк шотындағы жеке және заңды тұлғалардың ақшасының тағдыры не болмақ?
Иә, қазір Дельта Банктің қорында жеке және заңды тұлғалардың 92 миллиардқа жуық қаржысы бар. Ұлттық банктің шешімінен кейін сол салымшылардың алаңдап отырғаны белгілі. Сөйтсек, Дельта Банк депозиттерге міндетті кепілдік беру жүйесінің қатысушысы екен.
Яғни, банктегі азаматтардың ақшасы «Қазақстанның депозиттерге кепілдік беру қорымен» қорғалған. Сондықтан, уайымдауға негіз жоқ дейді Ұлттық банктегілер. Айта кетсек, жабылу алдында тұрған мекеме бұған дейін де Бас банктің қаһарына ілінген. Мәселен, 18 мамырда азаматтардан депозит қабылдап, шот ашу құқығынан айырылған еді. Кейін дәл осы лицензиясынан тамызға дейін қағылды. Бірақ, Дельта Банк бұдан да нәтиже шығармай, Ұлттық банк оны лицензиядан айыру жазасын қарашаға дейін ұзартты. Міне, енді оның да сабақ болмағанын көріп отырмыз.
- Айта кетейік, тықыр таянған қаржы ұйымы маусымда аймақтардағы филиалдарын жапқан. Яғни, көп ұзамай түбегейлі жабылатынын сезсе керек, банк бірден 7 қаладағы бөлімшесінің жұмысын тоқтатыпты.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
