Құлағынан қатты зақым алып, есту қабілеті төмендеген жаралы жауынгер жарылыстан кейінгі жағдайды қаз-қалпында баяндап берді.  Нұрболат Құрал өзге ауданнан әскери бөлімге бірнеше күн бұрын іссапармен келгенін айтады. Жолы болмаған әскери осылайша жарылыс ошағында қалып қойған. Ол дүмпуден кейін есеңгіреген біраз өрт сөндіруші мен әскерилерге көмек қолын создым дейді. Бірақ кей әріптестерін ажалдан құтқара алмағанына қатты өкінеді.

Нұрболат Құрал, Мотоатқыштар ротасы командирінің орынбасары:

- Сөйтіп жерге жатып қарадым. Себебебі айналамның бәрі қап-қараңғы болды. Қарасам жерде былай ғана ауа тазарып келе жатты. Қарасам біреулер жатыр, біреулер есін жоғалтып қойған. Олар тұрып алған кетіп барады. Естерін жоғалтып қойған.

Оңтүстік өңірлік әскери прокуратурасының аға прокуроры Нұрбек Күшековтың де құлағына зақым келіп, омыртқасы бірнеше жерден сынған. Бес күннен бері осында ем алып жатыр. 26-сы  күні кезекшілікте болған Нұрбек Күшеков апат орнына басшыларымен бірге жеткен екен. Ол келген бойда жотаға шығып, есеп беру үшін суретке түсіре бастапты. Сол кезде жойқын жарылыс болған.

Нұрбек Күшеков, Оңтүстік өңірлік әскери прокуратурасының аға прокуроры:

- Қатты дүмпу мені алысқа лақтырып жіберді. Алғашқыда жарақатымды сезбедім. Айналаның бәрі қара түтін, дым көрінбейді. Әр Әскерилердің көбі контузия алған. Сөйлесең ештеме түсініп тұрған жоқ. Беті қан жоса біреуіне жолықтым, бетіңді тұмшала десем түсіндейді.

Жарылыс бірінен кейін бірі екі мәрте тағы қайталанған. Нұрбек жаралы сарбазды ертіп, жолдан тағы біреуін қосып, жарыққа қарай жылжыған. Сөйтіп дуал жағалап қауіпсіз жерге шығыпты. Әскерилер жауынгерлердің осындай ерен ерлігі жоққа шығып жатқанына қапалы. Өрт сөндірушінің әскерилер «оқиға орнынан қашып кетті» дегені намысымызға тиді дейді.

Ораз Күшіков, «Оңтүстік» өңірлік қолбасшылығы әскерлері қолбасшысының тәрбие және идеологиялық жұмыстар жөніндегі орынбасары:

- Әскери қызметкерлер қашып кетті деген қауесет өтірік. Оған дәлел ретінде біздің де әскери қызмектерлердің қаза болуын айтуға болады. Үшеуі келісім шарт негізіндегі әскери қызмектер, біреуі офицер, біреуі әскериленген күзет қызмкеткері. Және тағы бір әскери жауынгер жоғалғандар тізімінде.

Ораз Күшіков, апат болған уақытта әскери бөлімен 42 сарбаздың қауіпсіз жерге шығарылғанын айтады. Бұл жас жауынгерлер Тұрар Рысқұлов ауданындағы әскери бөлімнен келгендер. Сол сарбаздардың жүгіріп шығуын көпшілік қате түсінген дейді. Ал оқыс оқиғадан зардап шеккен жауынгерлер аз емес екен.

Ораз Күшіков, «Оңтүстік» өңірлік қолбасшылығы әскерлері қолбасшысының тәрбие және идеологиялық жұмыстар жөніндегі орынбасары:

- 31 әскери қызметкер түрлі дене жарақатын алған. 29 әлі ем алып жатыр. Оның 19 әскери госпитальда, қалғандары қалалық ауруханада емделуде.

Ел арасында Арыс қаласындағы әскери бөлімнен жеткізілген оқ-дәрілер жарылды деген қауесет тараған. Бірақ Ораз Күшіков бұл деректі де жоққа шығарды. Оның сөзінше, жарылған 1970 жылдардан бері қоймада сақталған тротилдер екен. Еске салсақ, Байзақ ауданындағы әскери қоймада 6 күн бұрын жарылыс болып, 15 адам опат болды.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!