Алайда сол уақыттан бері тек құрғақ уәдемен тойдырып келген. Сондықтан халыққа берілуі керек болған миллиардтарды ортада бәз біреулер жымқырған деп күдіктенеді. Ал шенділер бөлінген қаражат жетпей қалды деп отыр.

Бұл атқамінерлердің табалдырығын тоздырып әбден ығыры шыққан жұрттың жанайқайы. Бәрі Наурызбай ауданының тұрғындары. Былтыр тұрып жатқан жерінің орнына «Қалқаман» метро бекеті мен Төле би көшесі ұзартылатын болған соң, үйлері сүріледі деп танылған. Шенділер ұсынған бағаға да қанағат тұтыпты. Бірақ сол күйі тиісті ақшаны ала алмаған.

Назым Дарқұлова:

- Қалқаманда, Наурызбай ауданында өткізіледі. «Төле би» деп, былтыр жазда бағалап кеткен. Алты айдың ішінде өтемақы түсу керек болған. Оны күттік. Алты айды қойып, оныншы айға кетті. Қайтадан бағаланады деді, Депутаттар сайлансын деді. Оны күттік.

Күте-күте әлі күнге дейін өтемақы ала алмай жүрген отбасы саны 60-қа жетіп қалған. Бірақ кейбір жер иесіне уақытында төленген. Қазір көше бойындағы үйлер кезек-кезек сүріліп жатыр. Жердің астаң-кестеңін шығаратын жұмыстан сау тұрған үйлердің қабырғасы жарылып, төбесі құлауға шақ қалған.

Хинуар Көпбосынова:

- Бір ай болды. Күнде шаң. Түсіріп жатыр топырақты, түсіріп жатыр. Көшені ақарасаңыз, дам жүретін жер емес. Адам емес, ит тұратын жер болып қалдық. Не ақшамызды бермейді.

Қуандық Шаймардан:

- Менің жанжағымда бүкіл үйді бұзып тастаған. Жерді қазған кезде астынан құмырсқа, тарақандар шығып, үйіме толып кетті. Көршінің үйіндегі тарақандар менің үйіме келді. Үйде тарақанның түртүрі бар. Әкім ақшаны алдыңғы жылы түсірген. Мына жақта ішінде былық болған. Нақты қандай былық екенін білмеймін. Жәій ғана ақшаны ұстап отыр. Ұсталған ақшаға пайыз түсіп отырады ғой. Ол өз  проблемалары. Бізге ақша берсін. Біз кетеміз.

Жер қатынастары басқармасының бастығы әу баста халықтың алдына шығып еді. Кейін аяқ-асты жоқ болды. Іздеп едік, таба алмадық.

- Жана ғана болған басқарма бастығы орнында жоқ екен. Есігін де ашып көріп жатырмыз. Кеңсесінде де жоқ. «Қайда» деп сұрасақ, «әкімдікке кетіп қалды» дейді.

- Бір күнді артқа тастап, әйтеуір жауап берді. Бірақ басшысының өзі емес – орынбасары.

Нұрлан Құлболдинов, Алматы жер қатынастары басқармасы басшысының орынбасары:

- Жер телімі сатып алынып отыр. Соның өзіне 4,3 миллирд кетті. Осы жаңа жылдан бастап Төле би бойынша 26 жер теліміне 1,2 миллиард қаражат белгіленген. Станция метродағы 23 жер телімін сатып алу бойынша 2,2 миллиард белгіленген. Сондықтан да жұмыс созылып кетіп отыр. Бөлінді, бірақ жетпей қалды.

«Кінә бізден емес» деген ол осы айдың аяғына дейін меншік иелеріне қаражат аударылады деп сендірді. Ал тұрғындар өтемақы осы жолы төленбесе, сотқа жүгінуге бекініп отыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!