«500 адамнан ауызбастырық». Шымкентте жүргізуші куәлігін сатып жүргендер ұсталды
Шымкентте жүргізуші куәлігін оңды-солды сатқандар ұсталды. Күдіктілер қатарында халыққа қызмет көрсету орталығының басшысы да бар. Олар қитұрқы жолмен екі жыл ішінде 500-ге тарта жүргізуші куәлігін саудалаған.
Автор: Бек Әбиев
02.05.2025
Шымкенттегі №2 Мамандандырылған халыққа қызмет көрсету орталығының басшысы қол астындағы қызметкерлермен бірге теория және практика емтихандарын тапсырмай-ақ, жүргізуші куәлігін беретін әдіс ойлап тапқан. Осы арқылы 2023-2024 жылдар аралығында ешқандай сынақсыз 500-ден астам адамға құжат жасап беріпті. Әрқайсысынан 150 мың мен 400 мың теңге аралығында ауызбастырық алған. Бірақ заңсыз әрекеттері ұзаққа бармай, құзырлы органдардың құрығына ілікті. 12 адам ұсталып, заңсыз жолмен тапқан дүние-мүлкіне бұғат қойылды.
Ернар Тайжан, ҚР Қаржы мониторингі агенттігінің ресми өкілі:
— Тергеуде күдіктілердің 200 млн теңгеден асатын мүлкін тәркілеу мақсатында тыйым салынды. Мүлік қатарында 2 жеке үй, 2 пәтер, 2 жер телімі және 10 автокөлік бар. Сот санкциясымен 12 күдіктіге қатысты қамауға алу түріндегі бұлтартпау шарасы қолданылды. Қылмыстық іс бойынша сотқа дейінгі тергеу жүріп жатыр.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
