Алматыда карантинге байланысты жаңа қаулы жарияланды
Құжатқа сәйкес, дәмханалар түнгі он екіге дейін жұмыс істейді.
Фото: astana.gov.kz
18:55 14.02.2021
Бассейндер мен халыққа қызмет көрсету орталықтарының жұмысына шектеу қойылған жоқ. Алматыда сауда ойын-сауық орталықтары, сауналар, бассейндер шектеусіз жұмыс істейтін болады. Қаланың бас санитар дәрігері Жандарбек Бекшин жаңа қаулыға қол қойды.
Құжатқа сәйкес, сауда ойын-сауық орталықтары, сауда орталықтары, сауда желілерінің жұмысына қойылған шектеу алынып тасталды. Бұған дейін 31 қаңтарда шыққан қаулыда бұл нысандар дүйсенбі-сенбі күндері сағат 10.00-ден кешкі 11-ге дейін жұмыс істеген еді. Жексенбі күні азық-түлік дүкендері мен дәріханалар ғана ашық болды.
Қоғамдық тамақтану орындары (сауда ойын-сауық орталықтары, қонақүйлердегілерді қоса) таңғы 7-ден 24.00-ге дейін жұмыс істейтін болады. Сағат 23.00-де тұрғындар тамақ үшін төлем жасап үлгеруі керек. 50 адамнан көп болмауы тиіс, адам саны сыйымдылықтың процентінен аспауы қажет. Әр үстелде 4 орын. Әлеуметтік қашықтық пен бетперде режимін сақтау шарт. Көп адам жиналатын шараларға әлі де тыйым салынып отыр. Бұған дейін қонақүй ішіндегі тамақтану орындары жұмыс істеген жоқ. Ал өзге дәмханалар 23.00-ге дейін ашық болды.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
