Президент адам құқықтары мен заң үстемдігі саласындағы іс-қимыл жоспарын бекітті

Онда былай делінген: 

- Қоса беріліп отырған Адам құқықтары мен заң үстемдігі саласындағы іс-қимыл жоспары бекітілсін.

- Қазақстан Республикасы Үкіметі:

1) Іс-қимыл жоспарын іске асыру бойынша қажетті шараларды қабылдасын;

2) жартыжылдық негізде 15 шілдеге және 5 қаңтарға дейін Президент Әкімшілігіне іс-қимыл жоспарының орындалу барысы туралы ақпарат ұсынсын.

- Осы Жарлық қол қойылған күнінен бастап қолданысқа енеді. 

Іс-қимыл жоспарымен мына сілтемеде танысуға болады.   

Осыған орай Қасым-Жомарт Тоқаев X (бұрынғы Twitter) парақшасында жазба жариялады.  

– Дүниежүзілік адам құқықтары күніне орай «Адам құқықтары мен заң үстемдігі саласындағы іс-қимыл жоспары туралы» жарлыққа қол қойдым. Жоспарда гендерлік теңдікті күшейтуге, тұрмыстық зорлық-зомбылыққа қарсы күреске, қылмыстық сот төрелігі саласында азаматтарды қорғауға, азаптау мен қатыгездіктің алдын алуға бағытталған бірқатар шара қамтылған. Бірлесу бостандығы құқығы мен еңбек құқығын, сондай-ақ мүмкіндігі шектеулі азаматтардың құқықтарын қамтамасыз ету жолдары қарастырылған. Құжат адам құқықтарын қорғаудың ұлттық жүйесін нығайтады. Жоспарды жүзеге асыру шеңберінде тиісті заңдар қабылданады – деп жазды Президент. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!