Елімізде табысы жоқ жастарға несие беруге шектеу енгізілмек
Қазақстанда табыс көзін көрсететін құжатсыз жастарға несие беруге тыйым салынбақ.
18:13 20.12.2023
Бұл туралы Мәжіліс депутаты Берік Бейсенғалиев айтты, деп хабарлайды Kazinform.
«Несие беру кезінде банк қарызды кімдер алып жатқанына қарауы керек. Онда тиісті тармақ ескерілген. 21-ге толмаған адам онлайн-кередит алу кезінде оны қай табыс көзі арқылы өтейтінін көрсетуі керек. Қазір ақшасы мен жалақысы болмаса да, бірнеше несие алып жатқан студенттер көп. Әрине, табыс көзі болмаса, несиені өтей алмайтыны түсінікті жағдай», - деді Б. Бейсенғалиев агенттік тілшісінің сұрақтарына жауап бере отырып.
Депутаттың айтуынша, студенттер бір несие алып, екіншісін жабуға пайдаланады.
«Бір несие алып, онымен екіншісін жауып тастайды. Осылай қарыздары жинақтала береді. Бұған жол бермеу үшін тиісті шектеу қарастырылған. Кірісті растайтын құжатсыз 21 жасқа толмаған адамға несие беруге тыйым салынады», — деп түсіндірді Берік Бейсенғалиев.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
