Түркістанда емделушілері туберкулез жұқтырған мекеменің басшылары түгел жұмыстан қуылды
Түркістандағы жаппай туберкулез жұқтырған психоневрологиялық емдеу мекемесінің басшылары түгел жұмыстан қуылды. Бұл туралы бүгін Денсаулық сақтау министрі хабарлады. Онсыз да ақыл-есі кем жандарға туберкулез бір науқастан жұғыпты. Ал мекеме қызметкерлері мұның алдын алмақ түгілі, қарапайым тазалықтың өзін сақтамаған.
Автор: Бек Әбиев
23.02.2017
Елжан Біртанов, ҚР Денсаулық сақтау министрі:
-Бұл әлеуметтік-медициналық мекемеде эпидемиологиялық ережелер мүлдем сақталмаған. Сол үшін залалсыздандыру жұмыстары жүргізіледі. Және осы жәйтке байланысты басшыларын да жұмыстан шығардық.
Қаңтар айында пациенттерді жоспарға сай тексеру кезінде мекемеде өкпе құртын жұқтырған 7 емделуші анықталған. Жағдайды жоғарыға баяндап, Астана мен Шымкенттен келген арнайы комиссия 502 пациенттің 61-не аталмыш дерт жұққанын, ал оның жартысы ашық түрімен ауыратынын біліпті. Тіпті, 3-уі осы аурудан көз жұмған. Қазір науқастардың барлығы арнайы мекемелерде ем қабылдауда. Ал, еліміздің бас санитары мен вице-министр бастаған мамандар мәселені майшаммен қарап жатыр.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
