Вава есімді Индонезиядағы Папуа провинциясының бұрынғы тұрғыны өзінің адамжегіш тайпаластарына 14 жылдан кейін австралиялық тележүргізуші Мэтт Доранмен бірге келді.

Вава комбая тайпасынан шыққан. Бұл тайпа әлі күнге дейін аңшылық және терімшілікпен күн көреді екен. Вава алты жасында ата-анасынан айырылыпты, ал одан кейін тайпа тұрғындары оны сиқыршы деп кінәлап, жеп қоймақшы болған. Бұл халықтың сенуінше, адамның етін жеу арқылы оның рухын жындардың арбауынан босатуға болады екен. 

Қуанышқа орай, Ваваны индонезиялық жүк тасымалдаушы құтқарып қалған. Ол баланың қашуына көмектесіп, кейіннен өз баласы секілді тәрбиелеген. 14 жыл Суматрада тұрып келген Вава қазір университетте оқып, христиан дінін қабылдаған көрінеді. Отанына қайта оралған Вава өзінің ағасы мен әпкесін тауыпты, ал жергілікті жұрт болса оны кең ықыласпен қарсы алған. 

Комбая халқы Жаңа Гвинея мен индонезиялық Папуа провинциясының шекарасында мекендейді. Олар ағаштың үстіне үй салып, жабайы шошқаны ақша ретінде пайдаланады екен. Соңғы рет бұл тайпа адам денесін жындардан босату үшін оның етін осыдан 4-5 жыл бұрын жепті. 

Дереккөз: stan.kz