Алматыда өткен баспасөз мәслихатында сейсмологиялық бақылаулар және зерттеулер ұлттық ғылыми орталығының директоры Дәулет Сәрсенбаев алматылықтар бүгін қатты жер сілкінісінен қорықпай, үйде қауіпсіз бола ала ма, әлде қала сыртында немесе қабылдау пункттерінде күту керек пе деген сұраққа жауап берді.

«Біздің сейсмикалық қауіпті аймақта тұратынымызды түсінуіміз керек. Жер сілкінісі үнемі болып тұрады. Мен өз басым үйде қалуды жоспарлап отырмын. Ешқайда бармаймын», – деді Дәулет Сәрсенбаев.

Сондай-ақ, бұқаралық ақпарат құралдарының өкілдері спикерлерден "Түркиядағы жер сілкінісінен кейінгідей күшті афтершок болу мүмкін бе?" деп сұрады. 

«Түркияда Оңтүстік Анадолы жарығы бойында негізгі жер сілкінісі болған соң, артынша афтершоктар тіркелді. Бұл осы аймақтағы жер қыртысының ерекшеліктеріне және онда жинақталған шиеленістерге байланысты. Біздің аймаққа келер болсақ, дәл осындай жағдай Қырғызстанның, Қытайдың шекаралық аумағында бар, ал бұл дүмпуден кейінгі сілкіністер негізгі сілкіністің қуатынан аспады», – деді Сейсмологиялық бақылаулар және зерттеулер ұлттық ғылыми орталығының директорының орынбасары Нұрсәрсен Өзбеков.

Дереккөз: Kazinform