Елена Чернышеваның бұл пәтерде тұрып жатқанына бес жыл. Мұнда көшіп келгенде балконында әйнек болмапты. Оны жабуға 350 мыңнан аса теңге жұмсаған. Енді келер жылы балконын қайта жөндетуге мәжбүр болмақ.

Елена Чернышева, Алматы қаласының тұрғыны:

- Айтарға сөзім жоқ. Мұндай жаңалықты күтпедім. Енді қайта шығынданамын ба? Жаңа балкон маған несіне керек? Шенеуніктер әрдайым бірдеңе ойлап табады. Алдымен жұрттың пікірін білуі керек қой.

Еленаның айтуынша, балконды жаңа дизайнға өзгертуге көршілері де түбегейлі қарсы. Өйткені қайта жөндеу жасаса, үй-іші шаң-тозаң болады. «Бар нәрсені өзгертудің не қажеті бар?», - дейді жұрт.

Ал шенеуніктер бұл шет елдерде бұрыннан бар ереже екенін айтады. Атқамінерлерге Алматыдағы тұрғын үйлердің сырт келбеті бұрыннан ұнамай жүріпті.

Алмасхан Ахметжанов, Алматы қалалық жоспарлау және урбанистика басқармасының басшысы:

- Бұл ереженің мақсаты – нысандардың сырт келбетін артық элементсіз, жинақы қылып жасау. Біз, әрине, тұрғындардың пікірін ескереміз. Балкондарды бірдей сәулет стиліне енгізу – халықаралық тәжірибе, Америка ашып жатқан жоқпыз. 

Ал жөндеу жұмыстары жұрттың ай сайын пәтер иелері кооперативіне беретін мақсатты төлемінің есебінен жасалмақ. Бірақ коммуналдық мекемелер бұл қаржының балкон жөндеуге жетпейтінін айтып, бастаманы  құптап отырған жоқ.

Бибігүл Жүнісбаева, Пәтер иелерінің кооперативтері қауымдастығының президенті:

- Қазір мақсатты төлемдер бір шаршы метрге 25 теңгеден есептеледі. Ол тұрғын үйдің подъезін жөндеудің өзіне әрең жетеді. Бұл қаражатқа балкондарды жаңа дизайнға өзгерту шығынын қосу дұрыс емес. Ондай болса, біз мақсатты алымның тарифін кемі екі есеге көбейтуіміз керек.

Сондықтан атқамінерлер қаладағы балкондарды бір қалыпқа келтіремін десе, бұған бюджеттен ақша бөлуі тиіс деп есептейді. Ал әкімдіктегілер балкондардың келер жылдан бастап кезең-кезеңімен біркелгі келбетке келтірілетінін айтып отыр. Олардың қандай дизайнда болатынын дайындап та қойыпты. Ал аталмыш өзгеріске қарсы адамдарды жазаламаймыз деп сендірді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!