Кейде киімнің де адам өмірін түбегейлі өзгертетін кезі болады. Нағиманың қызыл түсті жаңа көйлек алсам деген бір сәттік тілегі оның жеке өмірін өзгертіп жібереді. Ол өзін күйеуінің бағаламайтынын, жасы 40-қа келсе де әлі күнге романтика мен көңіл бөлгенді қалайтынын түсінеді. Нағима бал биін үйрететін курсқа барып, бір кездері өзі кәсіби түрде айналысқан би өнерін есіне түсіріп, өз өміріне өзгеріс енгізбек болады. Сөйтсе, би үйрететін жаттықтырушы бір кездері өзінің сүйген ғашығы, сахнада серіктесі болған жігіт болып шығады. Құрман Нағиманың тұрмыстағы келіншек екеніне қарамастан, бұрынғыдай қайтадан араласқысы келеді. Күйеуінің өзіне деген салқын қабағы Нағиманы қателік жасауға итермелей жаздайды. Алдында күйеуін жас қызбен көріп қойған Нағима оның басқа біреуі бар деп ойлап жүрген болатын. Алайда бәрі дер кезінде анықталып, өз орнына келеді. Сөйтсе, Нағима күйеуінің жанынан көрген қыз би жаттықтырушысы екен. Сапар олардың үйленген күндері жақындағандықтан сүйіктісіне тосын сый жасамақ болып, күнде би үйренуге барып жүріпті. Жұмыстан соң биге барып жүргендіктен үнемі шаршап жүргені сол екен. Нағима мұны дер кезінде анықтап, күмәнді ойларынан арылады.